Sekretarja amerikane e Shtetit, Hillari Klinton, planifikon të vizitojë Moskën gjatë kësaj jave. Klinton do të takohet me partnerët ndërkombëtarë për procesin e paqes në Lindjen e Mesme. Në Moskë do të jenë dhe kreu i Kombeve të Bashkuara, Ban Ki Mun, shefja e diplomacisë evropiane, Kethrin Ashton, përfaqësuesi i katërshes ndërkombëtare Toni Bler. Gjatë vizitës në Rusi, shefja e diplomacisë amerikane do të takohet dhe me presidentin rus, Dimitri Medvedev, në përpjekje për të ndërmjetësuar rreth marrëveshjes për çarmatimin bërthamor.

Kryetari i Partisë Socialiste Edi Rama ka pritur në pasditen e së hënës të dërguarin special të Kryetarit në Detyrë të OSBE-së, Konstantin Zhigalov. Në këtë takim i Dërguari Special i Kryetarit në Detyrë të OSBE-së shoqërohej nga Kreu i Prezencës së OSBE-së në Shqipëri, Ambasadori Bosch. Në takim u fol kryesisht për krizën politike, të krijuar pas zgjedhjeve të 28 qershorit. Nga ana e OSBE u përshëndet hapi i bërë nga Partia Socialiste për të hyrë në parlament, si edhe për propozimin për zgjidhjen e krizës me anë të iniciativave ligjore. Gjithashtu iu kërkua politikës shqiptare që të gjejë një zgjidhje sa më të shpejtë për këtë problem kaq të rëndësishëm. Përfaqësuesi i OSBE, shprehu interesin dhe mbështetjen e tij që çështja e transparencës së zgjedhjeve është shumë e rëndësishme.

Kryetari i Partisë Socialiste Edi Rama i shoqëruar nga një grup deputetësh kanë mbërritur në mesditë në fshatin Gërdec. Në dy vjetorin e tragjedisë që mori jetën e 26 personave, drejtuesit e opozitës kanë kryer homazhe dhe vënë tufa lulesh në afërsi të asaj çka u cilësua “fabrika e vdekjes”. Në fjalën e rastit para të pranishmëve, deputeti Namik Dokle tha se “ky është krateri i akuzës për ata që krijuan një masakër me qëllim përfitimin personal”.

Ambasadori spanjoll në Shqipëri Emanule Montobio, ka deklaruar në Forumin e Unionit për Mesdheun që u mbajt sot në Tiranë se mesdheu është kufi strategjik për Bashkimin Europian. Shqipëria të kujdeset për stabilitetin rajonal. Në fjalën e tij me këtë rast, Montobio duke shprehur rëndësinë që ka ky rajon tha se nuk duhet ndjekur një politikë periferike në Mesdhe, por sfidë e Shqipërisë janë pikërisht marrëdhëniet me partnerët. “Kujdesuni për stabilitetin rajonal”, iu drejtua Montobio në fjalën e tij përfaqësuesve të Shqipërisë në këtë Forum.

Policia e Vlorës ka gjetur sot në orët e para të mëngjesit trupin e pajetë të një qytetari. Sipas të dhënave paraprake të uniformave blu, të mbërritura në vendin e ngjarjes rezulton se shtetasi quhet Kujtim Memaj dhe se është 36 vjeç. Mësohet se kanë qenë kalimtarët e rastit ata që kanë evidentuar viktimën që ndodhej në një kanal dhe kanë raportuar në polici. Kjo e fundit po heton për të gjetur shkaqet e vdekjes së viktimës.

Me ftesë të ministrit të Jashtëm të Kosovës, Skënder Hyseni, ministri i Jashtëm i Maqedonisë, Antonio Milloshoski, po viziton sot Kosovën.
Përveç takimit me homologun kosovar, Skënder Hyseni, Milloshoski do të zhillojë takime edhe me presidentin e Kosovës, Fatmir Sejdiu dhe kryeparlamentarin Jakup Krasniqi.

Është gjetur sot në mëngjes i mbytur 2 vjeçari, i cili u denoncua i zhdukur një ditë më parë. Vogëlushi është gjetur i mbytur në Breg të Lumit, pranë përroit të shtëpisë. Ka qenë nëna e tij ajo që denoncoi humbjen e fëmijës që prej orës 10 të mëngjesit të së dielës. Ajo ka treguar se vogëlushi ishte parë për herë të fundit duke luajtur në breg të lumit paraditen e djeshme.

Komisioni parlamentar i Ligjeve do të vijojë sot shqyrtimin e projektligjit propozuar nga Partia Socialiste, për disa shtesa dhe ndryshime në ligjin ‘Për organizimin dhe funksionimin e komisioneve hetimore të Kuvendit”.

Diskutimi i sotëm është vazhdim i debatit në parim rreth këtij projekti përmes të cilit opozita kërkon hetimin dhe transparencën e procesit zgjedhor të 28 qershorit.

Komisioni parlamentar i Sigurisë Kombëtare pritet të kalojë sot për miratim amendamentet në ligjin për Shërbimin Informativ Shtetëror.

Deputeti demokrat në komisionin e Ligjeve, Eduart Halimi deklaroi se drafti nuk ka asnjë amendament antikushtetues. Madje në funksion të këtij qëndrimi ai shkoi më larg, duke mos ngurruar të ironizojë ambasadorin e SHBA-së në Tiranë, John Ëithers.